Sheeko: Noloshu waa sida shaaha

Koox arday waqti hore jaamacada ka baxay ayaa waxay booqasho gurigiisa ugu tageen mid ka mid ah macalimiinta loogu jecelyahay jaamacada.

Macalinkii ayaa soo dhaweeyay ardada, iyadoo salaan ka dib sheeko dheer laga yeeshay qofkasta horumarka uu sameeyay jaamacada ka dib, heerka uu nolosha ka marayo iyo caqabadaha la soo darsay.

Waxay waqti dheer ayay ka hadleen dhibaatooyinka nolosha, stress iyo culeysyada ka heysta shaqada iyo horumarka.

Macalinkii ayaa shaah u soo diyaariyay martida u timid, isagoo shaaha ku soo shubay koob kala duwan, kuwo qaali ah oo dhallo ka sameysan iyo kuwa raqiis ah.

Ardada shaahii ayay kala qaateen, iyagoo dhamaantood doortay shaahii lagu shubay koobta qurxoon, kuwii foolxumaana miiska ayaa looga tagay.

Macalinkii ayaa weydiiday "Ma dareenteen in shaahii lagu soo shubay koobta qurxoon ee qaaliga ah aad wada qaadateen balse kuwii raqiiska meesha looga tagay."

Cajiib ayay ku noqotay ardadii in aysan ku baraarugin arintaas.

Macalinkii ayaa ku yiri "Wax lala yaabo ma ahan in dhamaantiin aad qaadateen koobta qurxoon. Qofkasta oo naga mid ah waxa uu naftiisa la jecelyahay waxa ugu fiican, taasoo keeni karta qanacsanaan la'aan, stress iyo dhibaato."

Ardadii wali si fiican uma fahmin xiriirka ka dhexeeya koobta iyo dhibaatooyinka nolosha.

Macalinkii oo hadalka sii wata ayaa yiri "Mid ogaada, shaaha ku jira koobta waa isku tayo, oo koobka quruxdiisu ka badali meyso dhadhanka. Waxaad u baahneydeen waa shaaha laakiin muhiimadu ma ahan koobka uu ku jiro. Balse waxaad ku mashquusheen quruxda koobta."

Asagoo hadalka sii wato ayuu yiri "Waligiin xasuusnaada, haddii noloshu ay tahay shaaha, koobtuna ay tahay shaqada, lacagta, awooda, labiska, iwm, waxyaabahaas dhamaantoon waa kuwo ku saleysan qiimaha adigu aad siiso ee muuqaalku yuusan idinka mashquulin muhiimada nolosha.

Xikmada sheekadu waa in aadan ku mashquulin dhalaalka balse aad qiimeyso muhiimada nolosha.