Sheeko: Dhagax $2 million oo dollar ah.

Wiil yar ayaa aabihiis waydiiyay "aabe waa maxay qiimaha nolasheydu?"

Isaga oo aan u jawaabin ayuu dhagax qaali ah oo qasnada ugu jiray inta soo bixiyay waxa uu ku yiri "dhagaxaan suuqa gee, isku day in aad dadka ka iibiso laakiin markii ay qiimaha ku waydiiyaan labo farood kor u taag balse hala hadlin. Markii ay qiimo kuu gaaran haka iibin oo ii soo celi dhagaxa oo sidiisa ah."

Wiilkii suuqa ayuu tagay. Mama waayeel ah ayaa waydiisay qiimaha dhagaxa. Sidii la faray ayuu labo farood kor u taagay. "$2 dollar miyaa ayay waydiisay? Waan ku qaadanayaa."

Wiilkii aabe ayuu ku soo laabtay, isagoo u sheegay in loo gaaray 2 dollar.

Aabihii ayaa hadana ku yidhi "Waxaad geysaa madxafka (museum) taariikhda oo isku day in aad ka iibiso."

Sidii la faray ayuu tagay madxafka. Waxay u gaareen $200 dollar. Wiilkii oo faraxsan ayaa aabihiis ku soo laabtay isagoo u sheegay in loo gaaray $200 dollar.

Ugu dambeyn waxa uu ku yiri, waxaad geysaa dukaanka lagu iibiyo dhagaxaanta qaaliga ah sida dheemanka. Markii uu geeyay ayaa ninkii dukaanka joogay la yaabay. "Wow dhagax qaali ah ayaad wadataa. Waa imisa." Sidii la faray ayuu labo farood kor u taagay.

"Ma labo milyan oo dollar baa? Waa diyaar." Ayuu ku yiri. Wiilkii oo dhulka la wareegay ayaa aabihiis ku soo cararay. "Labo milyan ayaa la ii gaaray dhagaxa." ayuu ku soo qayliyay.

Aabihii ayaa ku yiri "Aabe waxaad gacanta ku haysaa waa mid ka mid ah dhagaxaanta aduunka ugu qaalisan. Noloshaadu waa sida dhagaxaas, qiimahaaga waxaad ka dhigi kartaa 2 dollar ama labo milyan oo dollar. Qofka qiimahaaga dhabta ah garanaya agtiisa qaali ayaad ka tahay."