Amaa dameer tahay? Sheeko xikmad badan

Libaax ayaa gaajo qabatay, markaasuu dawaco ku yiri "ii keen waxaan cuno ama adiga ayaan ku cunayaa."

Dawacadii ayaa aad u cabsatay, laakiin waxay ahay mid caqli badan. Waxay u tagtay dameer iyadoo ku tiri "libaaxu waxa uu doonayaa in uu kaa dhigo boqor."

Dameerkii  ayaa soo raacay. Libaaxii ayaa markii uu arkay dameerka ku soo orday oo dhagaha ka cunay balse waa uu baxsaday.

Dameerkii ayaa ku yiri dawacada "Waad isoo qiyaantay. Libaaxu in uu i cuno ayuu rabey." Waxay ugu jawaabtay "Iska daa doqonimada, dhagaha waxa uu kaaga gooyay si taajka boqorka uu madaxa si fudud kuugu galo."

Waxay ka dhaadhicisay in ay libaaxa ku laabtaan, isagoo aaminay in boqor laga dhigayo.

Markale ayuu hadana libaaxii soo weeraray dameerka, isagoo ka cunay saynta. Dameerkii hadana wuu fakaday isagoo ku yiri dawacada "Been baad ii sheegtay. Waad i soo shirqooshay." Dawacadii ayaa ugu jawaabtay "Saynta waxa uu kaaga jaray in aad si fudud kursiga boqorka ugu fariisato."

Markale ayay ka dhaadhisay in uu raaco. Sidii oo kale ayaa libaaxii intuu soo weeray ayuu gacanta ku dhigay, waana dilay.

Libaaxii ayaa ku yiri dawacada "Shaqo wacan ayaad qabatay. Maqaarka iiga bixi dameerka ka dibna iiga soo bixi beerka, sambabada, wadnaha iyo maskaxda."

Dawacadii dameerkii ayay inta maqaarka ka bixisay waxay cuntay maskaxdii, iyadoo libaaxa u keentay intii kale. 

Libaaxii ayaa waydiiyay dawacada "Aaway maskaxdii?"

Markaasay ugu jawaabtay "Boqorkeygii, maskax ma uusan lahayn, haddii uu maskax leeyahay miyuu isoo raaci lahaa markii aad dhagaha iyo saynta ka cuntay?"

Libaaxii ayaa ugu jawaabay "Waa runtaa."

Xikmada sheekadu waa in aadan noqon sida dameerka. Imisa goor ayaad qof jaanis siisay oo lagaa faa’idaystay? 

Ka taxadar cida aad aaminto. Wax kasta oo kula qurxoon run maaha.